Nagpagawas og pahimangno ang Bureau of Fire Protection (BFP) Bukidnon ngadto sa tanang residente sa lalawigan nga magpabiling magbinantayon ug mag-amping batok sa hulga sa sunog, bisan pa man sa kasamtangang panahon sa ting-ulan.
Sa usa ka eksklusibong pakighinabi sa Juander Radyo Malaybalay kang SFO2 Rene Rubillos, Operations Officer sa BFP Bukidnon, gipahayag niini nga dili angay nga magkugi lang sa paglikay sa sunog kon ting-init. Matud pa niya, sa pag-abot sa “ber months,” nagkalain-laing dekorasyon sa Pasko sama sa Christmas lights ang kasagaran nang gipangsiga sa mga kabalayan, nga kon dili matan-awan pag-ayo, mahimong hinungdan sa short circuit ug sunog.
Gidasig usab sa BFP ang publiko nga usisaon og maayo ang mga daan o gitipigan nga linya sa dekorasyon. Kon adunay gisi nga wire, nadaot nga insulation, o timailhan nga dili na luwas, maayong ipasuri kini sa kwalipikadong elektrisyan o ilisan na lang. Dugang pa ni Rubillos, isip pangandam sa posibleng hulga sa El Niño, padayon usab ang ilang gihimong fire prevention activities ug panawagan nga makigtambayayong ang tanan aron magpabiling luwas ang matag pamilya ug komunidad
Photo Courtesy: BFP – Bukidnon
