Gipalaig-on sa Pilipinas ug India ang ilang bilateral relations, atol sa pakigmiting ni President Ferdinand Marcos Jr. kang Indian Prime Minister Narendra Modi. Lakip sa ilang sentrong gihisgutan ang trade, investment ug agriculture, nga gilauman nga makahatag og dugang oportunidad sa ekonomiya sa duha ka nasod.
Makigkita usab si Marcos sa mga business leaders sa India aron hisgutan ang pagpalig-on sa pamatigayon ug pamuhunan tali sa Pilipinas ug India.
Sumala sa Department of Foreign Affairs, tumong usab sa maong pakigpulong nga ma-follow up ang mga investment pledge ug commitment sa mga Indian company nga gipahibalo atol sa pagbisita ni Marcos sa India niadtong Agosto 2025.
Niadtong miaging tuig, gipahibalo sa Presidente ang mokabat sa 5.8 billion dollars nga investment pledges gikan sa mga Indian company, ilabi na sa teknolohiya, panglawas, enerhiya ug imprastraktura.
Gitan-aw usab sa DFA nga dakong oportunidad alang sa Pilipinas ang mas lig-on nga relasyon sa mga nasod nga sakop sa BRICS, ilabi na sa trade diversification, economic cooperation, regional security ug climate resilience.
Photo Courtesy: PNA
