Na-side swipe ug naangol ang usa ka senior citizen nga babaye human mapingsan sa usa ka sakyanan sa National Highway sa Barangay Maayong Tubig, Dauin, Negros Oriental, alas-6 sa gabii niadtong Miyerkules niadtong nakalabay nga adlaw. Nasaksihan mismo sa Team Bravo sa Zamboanguita Rescue Team ang insidente samtang pabalik sila sa ilang opisina gikan sa laing rescue operation.
Mitubag dayon ang mga rescuers sa panawagan sa mga bystander ug gikontak ang Bureau of Fire Protection o BFP Dauin aron mahatagan dayon og medical assistance ang biktima.
Dili na madala sa rescue vehicle ang senior citizen tungod kay aduna na kiniy pasahero nga bag-o lang na-discharge sa hospital ug kinahanglan pa ihatod pauli. Sa sugyot sa Dauin Police Station, gisusi sa rescuers ang bag sa biktima aron mailhan siya, apan walay nakit-ang identification card.
Sa pagkakaron, wala pa matino sa mga otoridad kung asa gikan ug asa paingon ang biktima sa wala pa siya maligsan. Pag-abot sa BFP Dauin, mitabang ang Team Bravo sa luwas nga pagpasakay sa biktima ngadto sa ambulance aron dali siyang madala sa tambalanan.
