Ginapalig-on sang Philippine National Police ukon PNP sa Bangsamoro Autonomous Region in Muslim Mindanao ukon BARMM ang seguridad pinaagi sa pag-deploy sang 9,821 ka personnel para sa Parliamentary Elections sa Setyembre 14, 2026.
Pangunahan sang mga kapulisan ang seguridad sa 4,313 ka voting centers, samtang may deployment man sa mga opisina sang COMELEC, treasurer’s offices kag checkpoints sa bug-os nga rehiyon.
Nagpreparar man ang PNP sang 2,120 Quick Reaction Forces nga andam magresponde sa bisan ano nga emerhensya ukon insidente nga mahimo magluntad sa tion sang eleksyon.
May kabug-usan nga deployment sang 4,361 ka personnel ang halin sa Police Regional Office BARMM, samtang 5,460 ang augmentation forces halin sa iban nga police regional offices kag specialized units sang PNP.
Suno kay PNP Chief PGEN Jose Melencio Nartatez Jr., tinutuyo sang nasambit nga deployment nga masiguro ang malinong kag luwas nga pagbotar kag maprotektahan ang mga botante kag election personnel. Ginaagda man sang PNP ang publiko nga magreport gilayon sang bisan ano nga kahina-hinala nga aktibidad sa mga awtoridad.
Photo Courtesy: PNP Police Regional Office 12
