Gipahibalo ni Bureau of Internal Revenue (BIR) Commissioner Charlito Martin R. Mendoza nga nag-andam ang ahensya og bag-ong issuance aron tangtangon ang Value-Added Tax (VAT) sa allowable system loss charge nga makita sa mga bayranan sa kuryente. Kini nga lakang gihimo subay sa direktiba ni Presidente Ferdinand R. Marcos Jr. nga makahatag og dihadiha nga kahupayan sa mga konsumidor.
Pormal nga ipagawas sa BIR ang Revenue Memorandum Circular 15 ka adlaw human mapatik ang Energy Regulatory Commission (ERC) Resolution No. 26, Series of 2026. Pinaagi niini, opisyal nga giklasipikar ang system loss charges isip government-mandated pass-through cost sa mga bayranan sa kuryente.
Matod ni Mendoza, dili angay nga mobayad og VAT ang mga konsumidor alang sa elektrisidad nga wala man gyud makaabot sa ilang mga panimalay o negosyo. Ang pass-through charge usa ka gasto nga kolektahon gikan sa konsumidor ug ipasa ngadto sa tukmang nakadawat niini. Kung tangtangon ang VAT niini, mokunhod ang kantidad nga ipabayad sa mga konsumidor sa kuryente.
Ubos sa ERC Resolution No. 26, Series of 2026, ang allowable system loss pagatrataron isip recovered cost imbes nga taxable income alang sa mga generation companies, National Grid Corporation of the Philippines (NGCP), ug distribution utilities. Ang pagwagtang sa VAT sa maong charge gilauman nga makatabang sa pagpakunhod sa pinansyal nga kabug-at sa mga konsumidor sa kuryente.
Photo Courtesy: Philippine Information Agency
