Nakolekta sa Bureau of Customs (BOC) ang PHP664.776 bilyon gikan Enero hangtod Agosto 2026, ang pinakataas nga koleksiyon sa ahensya alang sa unang walo ka bulan sa usa ka tuig. Labaw kini og PHP5.47 bilyon sa PHP659.31 bilyong target sa BOC alang sa maong panahon.
Base sa preliminary collection report sa ahensya, misaka usab og 7 porsyento, o PHP43.39 bilyon, ang koleksiyon kumpara sa PHP621.39 bilyon nga nakolekta sa samang panahon niadtong 2025.
Bisan pa sa mga weather disturbance nga hinungdan sa pagsuspenso sa trabaho ug pagkaputol sa operasyon sa pipila ka lugar, napadayon sa BOC ang koleksiyon. Naapektuhan sa kusog nga ulan ang pag-unload ug pagproseso sa mga kargamento sa ubang pantalan, nga nakapahinay sa paglihok sa mga produkto ug kalihokan sa Customs.
Sa Agosto lamang, nakolekta ang BOC og PHP81.36 bilyon, 5.1 porsyento nga mas taas kaysa PHP77.35 bilyon sa Agosto 2025, o dugang nga PHP3.93 bilyon.
Bisan gamay nga wala maabot ang target sa Agosto, nagpabilin nga sobra sa target ang cumulative collection sa ahensya tungod sa lig-on nga performance sa unang walo ka bulan.
Miingon si Customs Commissioner Ariel Nepomuceno nga nagpakita ang resulta sa padayong paningkamot sa mga kawani sa BOC bisan pa sa mga hagit sa operasyon.
Gipunting usab ni Nepomuceno nga magpadayon ang ahensya sa pagpalig-on sa revenue collection pinaagi sa mas maayong compliance, tukmang valuation ug declaration sa mga produkto, mas lig-on nga enforcement, ug pakigtambayayong sa trading community.
Photo Courtesy:PHILIPPINES NEWS AGENCY
