Patay ang usa ka 21-anyos nga lalaki human gidunggab sa Lower Codcod, Barangay Codcod, San Carlos City, Negros Occidental, alas 9:00 sa buntag niadtong Septiyembre 7, 2026.
Base sa inisyal nga report sa San Carlos City Police Station, gi-aresto sa kapulisan ang duha ka lalaki nga 25 ug 51 anyos, nga giila isip mga suspek sa insidente, atol sa gipahigayong hot pursuit operation alas 5:07 sa hapon sa maong adlaw sa Bulado Port, Barangay Bulado, Guihulngan City, Negros Oriental.
Ang biktima giila nga si Willy Cagalitan, 21 anyos samtang mga suspetsado giila nga sila si Oliver Lopez, 51 anyos ug Franklin Abe, 25 anyos pulos residente sa nahisgutang Barangay. Personal nga panagbangi ang gitan-aw sa kapulisan nga posibleng motibo sa pag-atake og padayon pa ang imbestigasyon aron masuta ang tibuok detalye ug hinungdan sa insidente.
Sa pagkakaron ang mga suspek anaa na sa kustodiya sa San Carlos CCPS, alang sa tukmang disposisyon ug dugang nga imbestigasyon.
Photo Courtesy: SAN CARLOS CPS
