Gidasig ni Cebu Gov. Pamela Baricuatro ang mga mayor sa component cities ug municipalities nga suportahan ang pag-integrate sa health system sa tibuok probinsya aron masiguro nga patas ang kalidad sa serbisyo panglawas sa matag Cebuano.
Sa miting uban sa mga mayor ug local health officials, gihingusgan ni Baricuatro nga dili kinahanglan nga magdepende sa lugar nga gipuy-an ang kalidad sa healthcare nga madawat sa usa ka Cebuano.
Isip unang lakang, mipirma ang gobernador ug mga mayor sa commitment board ug misaad nga mangayo og awtorisasyon sa ilang tagsa-tagsa ka Sanggunian alang sa formal Inter-LGU Agreement. Ang lakang kabahin sa pagpatuman sa Universal Health Care Act o Republic Act No. 11223.
Matud ni Baricuatro, dili mawala ang awtoridad sa mga LGU sa pagdumala sa ilang rural health units ug barangay health stations. Ang integration magpalig-on hinuon sa referral system, technical support ug koordinasyon sa mga serbisyo panglawas.
Ang PhilHealth payments mahimo usab nga mapundo sa usa ka Special Health Fund alang sa mga health program sa mga partisipanteng LGU.
Photo courtesy: Cebu Province
