Nadakpan sa Lipa, Batangas ang usa ka 19-anyos nga estudyante human nagpakaaron-ingnon nga gikidnap aron makapangayo og P300,000 nga ransom sa iyang kaugalingong pamilya.
Sumala sa report, nakadawat og mensahe ang inahan sa biktima diin gipangayo ang P300,000 baylo sa iyang kagawasan. Gihatagan usab ang pamilya og duha ka oras aron mahatag ang kwarta.
Aron mas makombinsir ang iyang mga ginikanan, nagpadala pa ang estudyante og mga video diin makita siyang naghilak ug daw nagbilin og katapusang mensahe alang sa iyang pamilya. Apan wala madugay, nasubay sakapulisan ang iyang lokasyon ug nadiskobrehan nga siya ra diay usa ang anaa sulod sa usa ka hotel.
Sa dihang nasakpan, miangkon ang estudyante nga iyang gipeke ang pagkidnap aron makakuha og kwarta nga iyang gamiton sa pagbayad sa iyang mga utang sa sugal. Gikustodiya na siya sa kapulisan ug giandam ang tukmang kaso batok kaniya.
Photo Courtesy:Lipa City Police
