Mahimong sentro sa volleyball ang sugbo sa pag-abli sa ika-10 nga season sa Premier Volleyball League (PVL) ug Spikers’ Turf sa Oktubre 10 sa bag-ong SM Seaside Cebu Arena.
Gidala sa Sports Vision Management Group, Inc. (SVMGI) ang season opening celebration gawas sa Metro Manila aron ipakita ang nagkadako nga papel sa Cebu isip usa sa mga sentro sa volleyball sa nasud. Tulo ka duwa ang gipaabot sa maong adlaw.
Mag-atbang ang Choco Mucho ug Capital 1 alas-1 sa hapon, samtang ang pinakagihulat nga duwa tali sa Creamline ug Akari ipahigayon alas-6 sa gabii. Usa usab ka duwa sa Spikers’ Turf ang mokompleto sa triple-header.
Ang maong kalihokan kabahin sa pagsaulog sa ika-10 ka tuig sa duha ka liga sa pagpalambo sa volleyball sa Pilipinas. Dako usab ang koneksyon sa Sugbo sa PVL tungod sa daghang sugbuanong volleyball players nga nakaduwa sa professional league, lakip sila Sisi Rondina, Deanna Wong ug Isa Molde. Ang pag-host sa Sugbo sa season launch gilauman nga makadugang sa kahinam sa mga volleyball fans ug mangulo sa Visayas isip usa ka importante nga tinubdan sa mga talento sa volleyball sa nasud.
Photo courtesy: Cebu Daily News
