Gidepensahan sa Malacañang si Presidente Ferdinand Marcos Jr. batok sa mga kritisismo sa iyang pag-apil sa pribadong birthday celebration ni First Lady Liza Araneta-Marcos, human mikaylap ang hulagway sa maong selebrasyon taliwala sa pagbaha sa pipila ka lugar sa nasud.
Matud ni Palace Press Officer Claire Castro, nahitabo ang maong pagsaulog human nahuman ni Marcos ang iyang opisyal nga mga buluhaton ug dili sa kasagsagan sa kusog nga ulan ug pagbaha sa Central Luzon ug Metro Manila.
Giklaro usab ni Castro nga padayon nga gimonitor sa Presidente ang kahimtang sa panahon ug ang sitwasyon sa mga Pilipinong naapektuhan sa kalamidad.
Giila sa Palasyo ang kasagmuyo sa pipila ka mga Pilipino, apan gipasiugda nga mubo lamang nga panahon ang gigahin ni Marcos alang sa iyang pamilya ug wala kini makapugong sa iyang mga responsibilidad isip Presidente.
Matud pa ni Castro, padayon nga tutok si Marcos sa paghatag og tabang ug pagresponde sa panginahanglan sa mga kababayan nga naapektuhan sa kusog nga ulan ug pagbaha.
Photo Courtesy:PCO
