Patay ang usa ka 62-anyos nga lalaki nga usa ka mag-uuma human giingong nakuryentihan sa usa ka improvised battery-powered fishing device sa Purok San Francisco, Barangay Upper Pulacan, Labangan, pasado alas-4:50 sa hapon adlaw’ng Miyerkules, Septyembre 2, 2026.
Sumala sa Labangan Municipal Police Station, ang biktima nakit-an nalang nga naghigda kilid sa irigasyon nga nagkupot sa usa ka improvised battery-powered fishing device. Segun sa mga nakasaksi gigamit sa biktima ang maong device sa pagpangisda sayo pa nianang buntag ug gituohan nga nakuryentihan kini samtang nangisda.
Gisusi na sa doctor sa Labangan Rural Health Unit ang lawas sa biktima apan gideklarar nga patay na sa lugar, diin ang pagkakuryenti maoy unang gi-assess nga posibleng hinungdan sa iyang kamatayon.
Wala usab namatikdi nga may mga samad o mga bun-og sa lawas ang biktima diin mibalibad na usab ang tagtungod nga ipailawom pa sa otopsiya.
Samtang, ang patayng lawas sa biktima gidala na sa funeral home alang sa hustong pagdumala ug gikatakda usab nga dad-on sa Labangan, Zamboanga del Sur alang sa katapusang pagsud-ong sa pamilyang nagbangutan.
Photo Courtesy: ZSPPO
