Giklaro sa Department of Social Welfare and Development (DSWD) nga wala’y kamatuoran ang post nga mikatag online nga overpriced matud pa ang ilang mga ginatunol nga relief goods. Sumala pa, hugtanong gipasabot sa ahensya nga anaa lamang sa ₱797.80 ang tinuod nga kantidad sa matag Family Food Pack ug dili ₱1,503.84.
Gibutyag sa ahensya nga pagkahuman sa gipahigayong competitive bidding, ang kompanyang 2Go Global International Corporation ang ulahing gideklarang daog human nagtanyag og pinaka-ubos nga presyo nga ₱797.80 matag karton.
Lakip na sa presyo ang packaging materials sama sa regular slotted carton, vacuum rice bag, packaging tape, ug stretch film, ug ang delivery cost ug manpower.
Ang matag-pack dunay unod nga, unom ka kilo nga vacuum-packed nga bugas, upat ka lata sa corned beef, upat ka lata sa tuna, duha ka lata sa tinapa, lima ka sachet sa 3-in-1 coffee, ug lima ka sachets sa powdered choco malt drink.
Dugang pa niini, naghatag og kasigurohan ang nasangpit nga ahensya nga mahimo silang transparent sa tanan nilang transaksyon ug ilang ipaambit sa katawhan ang kumpletong bidding documents sa ilang opisyal nga procurement portal.
Photo Courtesy: DSWD
