Miabante sa second round sa US Open si 4-time Grand Slam champion Naomi Osaka human mapildi ang Russian tennis player nga si Anastasia Zakharova niadtong Lunes sa New York. Nakuha sa Japanese 13th seed ang kadaugan pinaagi sa score nga 7-6, 7-6, human sa kapin 2 oras nga duwa sa Arthur Ashe Stadium.
Bisan hugot ang duha ka sets, nakalampos si Osaka sa duha ka tie-break aron masiguro ang iyang pwesto sa sunod nga hugna sa torneyo. Nakakuha usab og atensyon ang iyang hitsura sa maong duwa, diin braided ang iyang buhok nga inspirado sa kanhi Philadelphia 76ers star ug NBA icon nga si Allen Iverson.
Matud ni Osaka, dako ang iyang pagtan-aw kang Iverson isip usa sa mga nagdala og dakong impluwensya sa fashion ug pagpahayag sa kaugalingong estilo sa sports.
Sa iyang pagsulod sa court, misul-ob usab si Osaka og custom-made gown nga adunay mga news clippings nga nagpakita sa mga importanteng bahin sa iyang tennis career.
Si Osaka midaog na sa US Open niadtong 2018 ug 2020, ug padayon karon ang iyang kampanya alang sa laing Grand Slam title.
Photo Courtesy: USOpen Org.
