Gilauman sa Department of Trade and Industry (DTI) nga mosubra pa sa gitakdang target sa gobyerno ang export performance sa Pilipinas karong tuiga, tungod sa kusog nga pagsaka sa sektor sa unang bahin pa lamang sa 2026.
Matud ni DTI Export Marketing Bureau Director Bianca Pearl Sykimte, positibo sila nga molapas sa forecast sa Development Budget Coordination Committee o DBCC nga mokabat sa tulo ka porsyento nga growth alang sa goods ug upat ka porsyento alang sa services.
Base sa pinakabag-ong datos sa Philippine Statistics Authority, misaka og 13 porsyento ang exports sa mga produkto gikan Enero hangtod Hulyo, nga mokabat sa 54.92 billion dollar, kumpara sa 48.67 billion dollar sa susamang panahon niadtong miaging tuig.
Dakong bahin sa maong pagtubo ang electronic products, nga misaka og 21 porsyento ngadto sa 30.92 billion dollar.
Niadtong 2025, nakaabot usab sa 84.48 billion dollar ang merchandise exports sa nasod, ang pinakataas nga natala sukad nagsugod ang pagrekord niini niadtong 1991.
Gilauman sa Philippine Exporters Confederation Incorporated nga magpadayon ang maayong performance sa exports hangtod sa kataposan sa tuig, ilabi na sa panahon sa Pasko diin kasagarang mosaka ang demand sa mga produkto sama sa garments, dulaan, housewares ug Christmas decorations.
Gilauman usab ang padayong pagtubo sa electronics ug agricultural products. Samtang, gibutyag sa mga ekonomista nga nakatabang sa export growth ang pag-diversify sa mga merkado sa Pilipinas, lakip ang pagtaas sa panginahanglan sa artificial intelligence-related products, semiconductors ug high-end electronics.
Sa service exports, nakabenepisyo usab ang business process outsourcing o BPO sector tungod sa mga cost-cutting measures sa nagkalain-laing nasod.
Apan, adunay pipila ka risgo nga mahimong makaapekto sa exports, lakip na ang El Niño-induced drought nga mahimong makapakunhod sa agricultural production, ingon man ang posibleng kagubot sa global oil supply nga mahimong magpataas sa presyo sa lana.
Samtang, padayon ang gobyerno sa pagpalapad sa mga merkado sa eksport pinaagi sa pag-negosasyon ug pag-promote sa mga Free Trade Agreements o FTAs.
Matud sa DTI, kapin 60 porsyento sa exports sa Pilipinas moadto sa mga merkado diin adunay trade preferences ang nasod.
Gilauman usab nga mapirmahan sa Pilipinas ug Chile ang ilang Free Trade Agreement sa Oktubre, samtang padayon ang negosasyon alang sa mga kasabutan sa European Union ug Canada, lakip ang pagrepaso sa Japan-Philippines Economic Partnership Agreement.
Photo Courtesy: Forbes Asia Customs
