Viral sa India ang istorya sa usa ka deboto nga aksidenteng nahulog ang iyang iPhone sa donation box o hundial sa usa ka templo, apan wala na kini gipabalik sa temple administration.
Ang lalaki nga giila sa ngalan nga Dinesh, uban sa iyang pamilya, mibisita sa Arulmigu Kandaswamy Temple sa Thiruporur, Tamil Nadu, niadtong Nobyembre 2024.
Samtang nag-ampo ug naghatag og donasyon, gibati ni Dinesh nga nahulog gikan sa iyang bulsa ang iyang iPhone ug diretsong nahulog sa metal nga donation box.
Dali siyang miduol sa mga opisyal sa templo ug mipasabot nga aksidente lamang ang pagkahulog sa iyang cellphone. Gihangyo niya nga makuha pag-usab ang iPhone, apan wala kini tugoti sa temple administration.
Sumala sa mga opisyal, base sa ilang patakaran ug tradisyon, ang bisan unsang butang nga masulod sa hundial, bisan pa og aksidente kini nga nahulog, giisip nang usa ka donasyon ug dili na mahimong ibalik sa deboto.
Gibuksan lamang ang maong donation box matag duha ka bulan. Niadtong Disyembre 21, 2024, gibuksan ang kahon ug mitambong si Dinesh aron sulayan pagkuha ang iyang cellphone. Apan napakyas gihapon siya tungod kay gipadayon sa mga opisyal ang ilang desisyon.
Misang-at usab si Dinesh og reklamo ngadto sa Hindu Religious and Charitable Endowments Department ug nangayo og klarong desisyon bahin sa iyang cellphone.
Matud ni Sekar Babu, opisyal sa maong departamento, ang mga butang nga maideposito sa offering box direktang mahimong kabahin sa account sa patron o diyos sa maong templo, ug dili tugotan sa ilang mga lagda ang pagbalik niini ngadto sa deboto.
Bisan pa niini, gitugotan si Dinesh nga makuha ang mga importanteng data nga anaa sa iyang iPhone. Gikonsiderar usab sa mga opisyal ang posibilidad nga bayaran na lang siya alang sa iyang cellphone.
Apan adunay mga opisyal nga nagduhaduha sa iyang bersyon nga aksidente lamang ang pagkahulog sa iPhone, tungod kay adunay metal nga harang palibot sa donation box.
Sumala pa sa report, dili kini unang higayon nga adunay gamit sa mga deboto nga aksidenteng nahulog sa hundial. Sa ubang kaso, adunay mga templo nga mibayad sa tag-iya human sa imbestigasyon.
Sa kaso ni Dinesh, maghulat pa siya sa pinal nga desisyon sa temple administration.
Photo Courtesy: Girls Corner
