Gipasabot sa Department of Labor and Employment (DOLE) Region 9 ang pagtaas sa unemployment rate sa Zamboanga Peninsula niining tuiga kumpara sa kaparehong panahon sa miaging tuig.
Sumala ni DOLE-9 Regional Director Albert Gutib, kung basehan ang latest data gikan sa January hangtud sa April taas na ang ihap sa mga walay trabaho ug usa sa rason niini nga daghan ang nag lay-off nga trabahante nga mga seasonal workers ilabina sa retail and service establishments.
Segun ni RD Gutib dili lang usa ang natumbok nga rason sa pagsaka sa unemployment rate gumikan adunay nagkalain-laing hinungdan nga nakaapekto sa kahimtang sa employment sa rehiyon, lakip na ang mga kausaban sa labor market ug job oppurtunities.
Bisan pa sa pagsaka sa unemployment rate, padayon ang DOLE 9 sa pagpatuman og mga programa aron matabangan ang mga nangita og trabaho ug mapalapad ang employment opportunities sa rehiyon.
Lakip niini ang pagpalapad sa mga job fair, paghatag og employment facilitation services, ug pakigtambayayong sa mga pribadong sektor ug lokal nga kagamhanan aron mas daghang jobseekers ang mahatagan og oportunidad sa trabaho.
Gipasalig usab ni RD Gutib nga padayon nilang bantayan ang kahimtang sa labor market aron matubag ang mga hagit nga giatubang sa mga trabahante ug jobseekers sa Zamboanga Peninsula Region.
Photo Courtesy: DOLE Region 9
