Nagplano ang Department of Energy (DOE) nga paspasan ang pagpalambo hangtod 5,000 megawatts nga coal-fired power capacity aron malikayan ang posibleng brownout sa nasud. Matud sa DOE, kinahanglan kining buhaton tungod sa forced outages ug pagkunhod sa kapasidad sa pipila ka coal-fired power plants.
Sukad niadtong 2020, gidili sa gobyerno ang pagtukod og bag-ong coal plants isip kabahin sa paningkamot nga mapakunhod ang pagsalig sa fossil fuels.
Samtang, gipadayon sa gobyerno ang target nga madugangan ang bahin sa renewable energy sa power mix ngadto sa 35 porsyento sa 2030 ug 50 porsyento sa 2040.
Sa Visayas, nakaabot na sa 27 ka red alerts ug 92 ka yellow alerts ang power grid sukad sa pagsugod sa tuig, tungod sa sunod-sunod nga problema sa dagkong power plants.
Gipasiugda sa DOE nga importante ang energy security aron malikayan ang brownout, bisan pa man sa padayong pagbalhin ngadto sa renewable energy.
