Giinagurahan ang bag-ong Zamboanga del Norte Provincial Forensic Unit–Liloy Satellite Office niadtong milabayng adlaw nga nagkantidad og ₱25-milyones nga gilaumang magdala sa mga importanteng forensic services nga mas duol sa mga komunidad sa ikatulong distrito ning probinsya.
Ang pagtukod niining satellite office gilaumang makapahimo nga mas daling ma-access ang pagproseso sa ebidensya ug mga forensic examinations, ilabi na alang sa mga kaso nga nagkinahanglan og teknikal ug scientific research.
Mitambong sa maong kalihukan sila sa ni Congressman Adrian Amatong, Liloy Mayor Roberto Uy Jr., PNP Forensic Group Director PBGEN Pierre Paul Carpio, Regional Forensic Unit 9 Chief PCOL Mary Jane Cordero, ug PLTCOL Danilo Bustillo Jr., sa ZNPPO uban sa ubang mga opisyal gikan sa Philippine National Police ug mga lokal nga yunit sa gobyerno.
Atol sa seremonyas, giila sa mga opisyal ang kooperasyon tali sa mga ahensya sa gobyerno ug mga lokal nga lider nga maoy hinungdan nga natukod ang maong pasilidad.
Matod ni Mayor Uy, ang pasilidad mahimong bililhon nga kapanguhaan sa pagtabang sa mga biktima ug pagsuporta sa imbestigasyon ug pagsulbad sa mga kaso. Gipadayag usab niya ang paglaum nga mapahimuslan kini pag-ayo alang sa kaayohan sa mga lumulupyo sa Liloy ug sa mga kasikbit nga komunidad.
Ang presensya sa usa ka dedikadong forensic facility sa Liloy gilaumang makapalig-on usab sa kapasidad sa mga ahensya sa pagpatuman sa balaod sa pagdumala sa mga imbestigasyon nga gibase sa ebidensya, ilabi na sa mga kaso diin ang siyentipikanhong eksaminasyon adunay importante nga papel sa pagtino sa mga kamatuoran.
Photo Courtesy: Provincial News Network
