Padayong popular ang pagkaon og snacks sa mga Pilipino, base sa 2026 State of Snacking Report sa Mintel ug Mondelez International.
Sumala sa pagtuon nga gihimo sa 13 ka nasod, 95 porsyento sa mga Pilipino ang mokaon og morning o afternoon snacks, samtang lima lamang ka porsyento ang dili mokaon og snacks. Lakip kini sa pinakagamay nga skip rate sa mga nasod nga gisurbi.
Matud ni Caitlin Punzalan, Corporate and Government Affairs Lead sa Philippines sa Mondelez International, kasagaran mokaon og snacks ang mga Pilipino aron makadugang og enerhiya ug makapadayon sa ilang mga buluhaton.
Gipakita usab sa pagtuon nga mokabat sa 30 hangtod 37 porsyento ang mokaon og snacks alang sa energy boost, samtang 38 porsyento ang mipili og snacks nga adunay nutritional benefits. Mas gipangita na usab karon sa mga konsumidor ang mas himsog nga snacks, lakip ang adunay fiber ug vitamins.
Samtang, gipahayag sa industriya sa retail nga posibleng mosaka ang presyo sa mga pagkaon kung madayon ang dugang nga excise tax sa sweetened beverages ug single-use plastics.
Sumala ni Steven Cua, Executive Director sa Philippine Amalgamated Supermarkets Association, ang pagsaka sa buhis mahimong mosangpot sa pagsaka sa presyo ug pagpangita sa mga konsumidor og mas barato nga alternatibo.
Nanawagan usab ang Mondelez International sa gobyerno nga tun-an pag-ayo ang posibleng epekto sa maong mga buhis dili lamang sa mga manufacturers, kundili apil ang mga retailer, sari-sari stores ug mga supplier sa agrikultura.
Photo Courtesy: Pinterest
