Gipasigarbo sa Oponganong jiu-jitsu athlete Mechelle Zapanta ang ngalan sa Pilipinas human nakadaog og silver medal sa Southeast Asian Regionals nga gipahigayon sa Cambodia.
Nakarekord si Zapanta og tulo ka daog ug usa ka kapildihan sa upat ka duwa. Mapasalamaton si Zapanta sa iyang kasinatian ug gihimong inspirasyon ang resulta aron mas molambo pa alang sa umaabot nga mga kompetisyon.
Gipasalamatan usab niya ang lokal nga kagamhanan sa dakbayan sa Lapu-Lapu, ilabina si Mayor Cindi King-Chan ug ang Lapu-Lapu City Sports Commission nga gipangulohan ni Commissioner Vince Carungay, tungod sa padayong suporta sa iyang kompetisyon sa gawas sa nasod.
Gipasalig usab sa dakbayan ang padayong suporta sa mga batan-ong Oponganon sa nagkadaiyang sports pinaagi sa City Sports Commission aron mapalambo ang ilang abilidad, kinaiya ug pangandoy sa ilang piniling larangan.
Photo courtesy: Lapu-Lapu City Information Office
