Gipahigayon sa BJMP Dipolog City District Jail Male Dormitory ang mangrove planting ug clean-up drive activity sa Dakak Beach Resort, Barangay Taguilon, Dapitan City, niadtong nakalabay nga adlaw.
Ang maong kalihukan kabahin sa pagsaulog sa Community Relations Service o CRS Month, nga nagtumong sa pagpalig-on sa relasyon tali sa BJMP ug sa komunidad, ingon man sa pagpanalipod sa kinaiyahan.
Gipangunahan ang maong aktibidad ni JCINSP Jonathan Arawangsa, jail warden sa BJMP Dipolog City District Jail Male Dormitory, kauban ang CENRO Dapitan. Mitambong usab ang pito ka jail facilities nga sakop sa probinsya sa Zamboanga del Norte, nga naglakip sa Siocon District Jail, Liloy District Jail, Salug District Jail, Sindangan District Jail, Dipolog City District Jail Male Dormitory, Dipolog City District Jail Female Dormitory, ug Dapitan City District Jail.
Misalmot usab ang mga personahe sa BJMP Regional Office IX ubos sa pagpanguna ni Regional Director JCSUPT Amado A Concepcion Jr., CESE, nga girepresentahan ni JSUPT Miguel D Langcauon, Regional Chief of Directorial Staff.
Atol sa kalihukan, mokabat sa 200 ka mangrove seedlings ang natanom. Aduna usab silay gitakdang aftercare program aron maatiman ang mga mangrove nga gitanom ug masiguro ang ilang pagtubo.
Sumala kang JCINSP Arawangsa, dili lamang sa pagserbisyo sulod sa ilang mga pasilidad nakasentro ang BJMP, kondili aduna usab silay mga programa alang sa komunidad, lakip na ang ABAKADA, feeding program ug uban pa.
Kabahin usab sa tumong sa clean-up drive ang paglimpyo sa baybayon, ilabi na kay umaabot na ang fishing tournament nga abli sa tanang gustong moapil ug ipahigayon sa maong lugar sa Nobyembre 7, 2026.
Gipasalamatan ni JCINSP Arawangsa ang management ug staff sa Dakak Beach Resort, ingon man ang tanang miapil sa kalihukan, tungod sa ilang suporta ug kooperasyon.
Photo Courtesy: BJMP Dipolog City District Jail Male Dormitory
