Mikunhod og 0.2 porsyento ang ekonomiya sa probinsya sa Sarangani niadtong 2025, base sa datos sa Philippine Statistics Authority o PSA. Mikubos ngadto sa 52.57 bilyong pesos ang Gross Domestic Product o GDP sa probinsya niadtong 2025, gikan sa 52.68 bilyong pesos niadtong 2024, base sa constant 2018 prices.
Pangunang nakaapekto sa ekonomiya ang pagkunhod sa Agriculture, Forestry and Fishing o AFF nga mikunhod og 10.9 porsyento, samtang niubos usab og 6.9 porsyento ang construction sector. Sa laing bahin, mitubo og 3.4 porsyento ang sektor sa serbisyo ug nahimong usa sa mga nag-unang nakasuporta sa ekonomiya sa probinsya.
Lakip sa mga industriya nga nakarekord og pagtubo ang Public Administration and Defense; Compulsory Social Security nga misaka og 12.8 porsyento, Wholesale and Retail Trade; Repair of Motor Vehicles and Motorcycles nga mitubo og 10.3 porsyento, Financial and Insurance Activities nga 10.2 porsyento, Accommodation and Food Service Activities nga 9.4 porsyento, ug Transportation and Storage nga 8.2 porsyento.
Samtang halos wala usab mausab ang performance sa sektor sa industriya, nga mitubo lamang og 0.001 porsyento niadtong 2025. Sa kinatibuk-an, ang pag-uswag sa sektor sa serbisyo nakatabang sa pagpugong sa mas dako nga pag-urong sa ekonomiya sa Sarangani, bisan pa sa dakong pagkunhod sa agrikultura, pangisdaan ug konstruksyon.
