Gihingusgan sa Tantangan Municipal Police Station ang kampanya batok sa pagbaligya ug pag-apod-apod sa mga smuggled ng sigarilyo pinaagi sa pagbisita sa mga tindahan sa lungsod.
Gipahigayon sa mga personnel sa Tantangan MPS, ubos sa pagpangulo ni Police Major Romeo S. Albano Jr., hepe sa kapulisan sa lungsod, ang maong kalihokan aron pahinumdoman ang mga tag-iya ug empleyado sa mga tindahan sa pagsunod sa kasamtangang mga balaod batok sa ilegal nga patigayon sa sigarilyo.
Atol sa pagbisita, gipasiugda sa kapulisan ang importansya sa pagsuporta sa lehitimong patigayon ug paglikay sa pagbaligya ug pag-apod-apod sa mga sigarilyong walay saktong dokumento o ilegal nga gisulod sa nasud.
Gipasabot usab nga ang smuggled cigarettes mahimong makaapekto sa kita sa gobyerno, patas nga kompetisyon sa mga negosyante, ug kaluwasan sa komunidad.
Giawhag ang mga negosyante ug katawhan nga motabang sa kampanya pinaagi sa pagreport dayon sa mga suspetsadong kalihokan nga may kalabotan sa ilegal nga patigayon sa sigarilyo.
Gipasiugda sa Tantangan Police nga importante ang aktibong kooperasyon sa komunidad aron mapanalipdan ang lokal nga ekonomiya ug mapadayon ang kalinaw ug kahusay sa lungsod.
