Nasamdan ang usa ka 50-anyos nga lalaki human maapil sa vehicular accident nga nahitabo sa National Highway, Barangay Gango, RT Lim, Zamboanga Sibugay pasado alas-1:30 sa hapon niadtong nakalabay nga adlaw.
Sumala sa RT Lim Municipal Police Station, nakadawat sila og tawag gikan sa usa ka concerned citizen bahin sa aksidente. Dali usab nga mitubag ang mga personnel sa kapulisan nga gipangulohan sa usa ka investigator aron susihon ang nahitabong insidente.
Base sa inisyal nga imbestigasyon, nagbiyahe sa magkaatbang nga direksyon ang duha ka sakyanan—usa ka Mazda Fair nga adunay plate number MEN 8058 ug usa ka Mitsubishi Wing Van Truck nga adunay plate number NFY S705.
Sa dihang nakaabot sa lugar sa aksidente, giingong misulod sa opposite lane ang Mazda ug padulong kini sa direksyon sa Mitsubishi. Misulay pa ang driver sa Mitsubishi nga malikayan ang pagkabangga, apan nabangga gihapon sa Mazda ang wala nga bahin sa maong truck.
Tungod sa impact, natuyok ang Mazda ug nasamdan ang 50-anyos nga driver niini. Gidala siya sa RT Lim Family Hospital alang sa medikal nga pag-atiman.
Samtang wala maunsa ang driver sa Mitsubishi. Parehong nadaot ang duha ka sakyanan ug gidala ngadto sa RT Lim MPS alang sa hustong disposisyon ug dugang nga imbestigasyon.
