Gituymbok sa Philippine Drug Enforcement Agency kun PDEA-Region 9 ang Zamboanga City nga maoy usa sa mga entry point sa pagpasulod ug pag-apod-apod sa illegal drugs sa rehiyon gikan sa laing nasud.
Kini ang gibutyag sa Kapihan sa Rehiyon Nueve ni PDEA-9 Regional Director Bryan Babang, diin iyang giingon nga balik-balik ang dagkong drug seizures sa Zamboanga City ug adunay mga operasyon nga nalambigit ang mga suspetsado gikan sa laing mga probinsya.
Dugang pa ni RD Babang, gikan sa laing nasud ang dakong bulto sa illegal drugs nga ilang nakumpiska ug gipaagi sa Zamboanga City, ug gipalusot kini sa mga drug suspect ngadto sa mga coastal barangay sa matag siyudad.
Giangkon sa opisyal nga dakong hagit sa operatiba ang pagpugong sa pagsulod sa illegal drugs sa Zamboanga Peninsula Region, ilabina tungod sa mga coastal area nga mahimong magamit isip entry point.
Sa karon padayon usab ang PDEA sa ilang koordinasyon sa PNP ug ubang law enforcement agencies aron maputol ang mga network nga nagdala ug nagpakatap sa illegal drugs sa rehiyon.
