Giawhag sa Department of Health (DOH) Zamboanga del Sur ang mga pribadong establisyemento nga magbutang ug designated lactation room alang sa mga inahan nga nagpasuso sa ilang mga anak.
Matud ni Junice Espinosa, Provincial Nutrition Program Coordinator, subay sa Republic Act 10028 o Expanded Breastfeeding Act, gikinahanglan nga adunay designated lactation room sa mga pampubliko ug pribadong establisemento aron adunay tukmang lugar ang mga inahan alang sa breastfeeding.
Gipasiugda usab niya nga ang paghatag og hapsay, limpyo ug pribadong lugar alang sa breastfeeding usa ka dakong suporta sa mga inahan, ilabina niadtong anaa sa trabaho o anaa sa mga pampublikong lugar.
Sumala niya, importante nga adunay tukmang lugar diin ang mga inahan makapadayon sa breastfeeding bisan pa anaa sila sa trabaho o naa sa gawas sa ilang panimalay.
Ang lactation room kinahanglan nga limpyo, pribado ug komportable, aron dili maulawan o mahasol ang mga inahan samtang nagpasuso o nag-express sa gatas alang sa ilang mga anak.
Samtang nanawagan siya ngadto sa mga pribadong establisemento nga mosunod sa balaod ug maghatag og breastfeeding-friendly nga palibot alang sa mga inahan ug ilang mga anak.
