Gipakusgan sa Lokal nga Kagamhanan sa San Miguel, Surigao del Sur, pinaagi sa Municipal Agriculture Office (MAO) ug sa koordinasyon sa Provincial Veterinary Office (PVET), ang surveillance, monitoring ug preventive measures batok sa African Swine Fever o ASF.
Kini human nadawat sa LGU ang resulta sa blood sampling nga gihimo sa pipila ka barangay, diin halos tanan sa mga sample nga nasusi nagpakita og positibong resulta alang sa ASF.
Gipahigayon ang blood sampling niadtong Agosto 7 sa Barangay Patong, Agosto 14 sa Barangays Libas Sud, Poblacion ug Tina, ug Agosto 25 sa Barangay Poblacion.
Tungod niini, gi-activate na sa LGU San Miguel ang Municipal ASF Task Force ug gipakusgan ang monitoring ug surveillance sa mga apektado ug high-risk nga lugar posible usab ang pagdeklara og State of Calamity tungod sa kasamtangang sitwasyon.
Gipalig-on usab ang koordinasyon tali sa Municipal Agriculture Office, Provincial Veterinary Office, mga opisyal sa barangay ug Municipal ASF Task Force, lakip ang pagpatuman sa mas hugot nga biosecurity measures alang sa mga hog raisers ug pig handlers.
Photo courtesy: Lgu San Miguel Sds
