Nagpagawas og opisyal nga pahayag ang Municipal Health Office (MHO) sa Santo Tomas, Davao del Norte, Agosto 24, 2026 bahin sa gikatahong food poisoning nga nakaapekto sa 29 ka estudyante sa Tulalian National High School.
Gireport nga nakasinati ang mga estudyante og sakit sa tiyan, kasukaon, padayon nga pagsuka ug pagkalipong, hinungdan nga gilayon silang gitabangan sa mga health personnel uban sa mga barangay ug Local Disaster Risk Reduction and Management Office (LDRRMO). Gidala dayon ang mga estudyante sa Rural Health Unit sa Santo Tomas alang sa medical evaluation ug pagtambal.
Sa 29 ka estudyante, 18 ang girefer sa Davao del Norte Hospital Carmen Zone, upat sa Davao Regional Medical Center, usa ang gibalhin sa pribadong ospital sa hangyo sa ginikanan, samtang unom ang gi-clear human walay makita nga sintomas.
Giingon usab nga ang DOH, DSWD ug LGU Santo Tomas nagtinabangay aron masakop ang gasto sa medical treatment ug malikayan ang bayranan sa mga pasyente sa mga ospital nga nag-atiman kanila.
Samtang, gipadala sa Municipal Epidemiology and Surveillance Unit (MESU) ang ilang team ngadto sa eskwelahan aron inspeksyunon ang canteen ug mga food vendor sa palibot. Gikolekta usab ang mga sample sa pagkaon ug gipadala sa laboratoryo aron mahibal-an ang posibleng tinubdan ug hinungdan sa insidente.
Gihangyo sa MHO ang publiko nga dili magpakaylap og dili beripikadong impormasyon sa social media aron malikayan ang kalisang, ug misaad kini nga magpagawas og dugang nga update kung anaa na ang resulta sa laboratoryo ug imbestigasyon.
Photo courtesy: MIO Santo Tomas
