Nakapatigayon sang pipila ka operasyon batok sa ilegal nga droga ang Police Regional Office 12 ukon PRO-12 halin Agosto 21 tubtob 22, 2026. Kabug-usan nga pito ka anti-illegal drug operations ang ginpatigayon, lakip ang lima ka search warrant operations kag duha ka buy-bust operations kun sa diin lima ka drug personalities ang nadakpan, lakip ang isa ka high-value individual ukon HVI.
Nakumpiska sang mga otoridad ang kapin 34.799 gramos sang ginapatihan shabu nga nagabalor sang P236,633.20, kag 1.2 gramos sang ginapatihan marijuana nga nagabalor sang P144. Kabug-usan nga balor sang nakumpiska nga ilegal nga droga naglab-ot sa P236,777.20.
Narekober man sa operasyon ang isa ka caliber .38 revolver, walo ka buhi nga bala kag nagkalain-lain nga drug paraphernalia. Duha naman ka target sang operasyon ang nakapalagyo kag padayon nga ginapangita sang kapulisan.
Suno kay PRO-12 Regional Director PBGEN Alan B. Manibog, padayon pa nila nga pabaskugon ang kampanya batok sa ilegal nga droga, paagi sa husto nga impormasyon, koordinasyon kag pagsunod sa balaod.
