Arestado ang usa ka 45 anyos lalaki, kinsa nagpalusot og ilegal nga sigarilyo atol sa buy-bust operation, sa Pantalan 1, Barangay Taft, Dakbayan sa Surigao. Gipangulohan sa Regional Anti-Smuggling Unit sa Surigao del Norte ubos sa pagdumala ni PCPT Romer C. Acos ug PCOL Rolly D. Albaña, ang operasyon kauban ang operatiba sa Surigao Component City Police Station nga gipangulohan ni PLTCOL Atty. Mariano C. Lukban.
Nakuha gikan kaniya ang 147 ka reams sa nagkalain-laing brand sa sigarilyo nga adunay gibanabangang mikantidad 65,250 pesos. Lakip sa nakumpiska ang 49 ka reams Cannon Menthol, 34 ka reams Modern, 10 ka reams Castorce, 27 ka reams Aries, 25 ka reams Cannon Black, ug duha ka reams Cannon nga gigamit isip buy-bust items.
Narekober usab ang marked money nga 1,000 pesos isip buy bust money. Sa pagkakaron giandam na ang kasong ipasaka sa suspek nga mao ang paglapas sa RA No. 10643 (Graphic Health Warning Law).
