Gilauman nga molambo pa ang pag-eksport sa mga produkto sa agrikultura gikan sa Estados Unidos diri sa Pilipinas, bisan pa sa nagkakusog nga kompetisyon sa tibuok kalibotan ug sa padayong pagrepaso sa Washington sa mga kasabutan sa patigayon.
Sumala ni Virginia Houston, Senior Director of Government Affairs sa American Farm Bureau Federation (AFBF), positibo sila nga adunay dugang nga pagtubo sa exports tungod kay ang Pilipinas usa ka merkado nga padayon nga nagkalapad. Bisan pa sa maayong panan-aw sa pagtubo sa exports, giingon ni Houston nga nag-atubang ang Estados Unidos og mas kusog nga kompetisyon gikan sa ubang nasod nga nag-eksport og mga produkto sa agrikultura.
Wala hinuon kini maghatag og forecast sa kantidad sa mahimong pagtubo. Lakip sa mga nagkompetensya sa US mao ang China, Australia ug Brazil, nga aktibo usab sa pag-eksport sa mga produkto sa agrikultura ngadto sa Southeast Asia.
Gipasabot ni Houston nga ang lokasyon sa maong mga nasod naghimo kanila nga importante nga kompetensya sa merkado sa rehiyon.
Photo Courtesy: Tehran Times
