Nakakuha og dakong isda nga gitimbang og 214 kilos ang usa ka mananagat sa Barangay San Isidro, Padada, Davao del Sur. Ang mananagat nga nailhan sa alyas nga Bolantoy maoy nakakuha sa maong isda pinaagi sa mano-mano nga pagpangisda.
Matud sa uploader nga si Louie Dagat, gigamit sa pagkuha sa isda ang mainline nga #110 nylon, #80 nylon nga leader line, ug Chicago #11 nga hook. Ang paon nga gigamit mao ang belong-belong o nukos. Gitawag sa mga lokal nga bariles ang maong isda, nga miabot sa 214 kilos ang gibug-aton.
Matud pa sa mga residente sa barangay, sukad-sukad karon pa sila nakakita og isda nga ingon kadako ug kabug-at nga nakuha sa ilang dapit. Nagpakita usab kini sa kadagaya sa pangisdaan sa kadagatan sa maong lugar.
