Nagpahimangno ang TESDA Zamboanga del Sur sa publiko batok sa pagpalusot ug paggamit sa mga peke nga National Certificate (NC) nga gigamit sa pagpanarbaho sa bisan asang mga trabahoan o ahensya.
Matud ni Tesda Zamboanga del Sur Provincial Director Engr. Samad Dibansa, tanang paningkamot ilang gihimo aron maundang ang paggamit sa mga peke nga NCs hinungdan dili ra rampant ang kaso niini sa lalawigan.
Segun ni Engr. Dibansa nga ang National Certificate usa ka opisyal nga dokumento nga nagpamatuod sa competency sa usa ka tawo human makapasar sa assessment alang sa usa ka technical-vocational qualification.
Gipasidan-an usab niya ang mga indibidwal nga likayan ang paggamit og peke nga NCs alang sa pagpangita og trabaho tungod kay mahimo kining mosangpot sa legal nga responsibilidad ug silot.
Samtang, gidasig usab ni Engr. Dibansa ang publiko nga magmatngon ug siguruhon ang pagbaton ug lehitimong mga National Certificate pinaagi sa hustong mga proseso ng gitakda sa TESDA Office.
