Nakatutok karon ang mga T’boli embroidery artist gikan sa Sitio Lem-ehek, Barangay Poblacion sa Lake Sebu, South Cotabato, human mapili ang ilang mga handcrafted patches alang sa unang Philippine indigenous craft collection sa UNIQLO. Gihimo ang proyekto uban sa Davao-based designer nga si Wilson “Niñofranco” Limon ug National Commission for Culture and the Arts o NCCA-School of Living Traditions.
Kauban sa koleksyon ang mga artisan gikan sa Itneg sa Luzon ug Panay Bukidnon sa Visayas, isip pagpakita sa nagkadaiyang indigenous crafts sa Pilipinas. Gamit ang tradisyonal nga embroidery ug recycled fabric scraps gikan sa Re.UNIQLO program, naghimo ang mga T’boli artist og mga disenyo nga inspirado sa kabukiran, wildlife ug kultura sa South Cotabato.
Gibaligya ang matag patch sa P300, diin 100 porsyento sa kita ibalik ngadto sa Lake Sebu community ug sa mga participating indigenous groups. Mahimong mapalit ang mga patch sa mga piniling UNIQLO branches, lakip ang Davao repair hub, diin mahimo usab kining ipatahi sa gigamit na nga UNIQLO apparel.
Matud sa UNIQLO, ang proyekto dili lamang nagsuporta sa sustainable fashion, kondili naghatag usab og oportunidad aron mapadayon ug maila sa mas daghang Pilipino ang tradisyonal nga talento sa mga indigenous artist.
Photo Courtesy: NCCA
