Magbutang ang Local Government Unit sa Mahayag og PDAO head sa matag barangay aron mas mapalig-on ang paghatag og serbisyo sa mga Persons with Disabilities (PWDs) subay sa hangyo PWD sector.
Matud ni Mahayag Mayor Manuel Saladaga, dako ang ikatabang niini aron sa lebel pa lang sa barangay mahimong mas organisado ang pagpatuman sa mga programa ug mas dali mailhan ang mga panginahanglan sa mga PWD.
Naglaum ang mayor nga pinaagi sa maong lakang, mas molig-on ang koordinasyon tali sa mga barangay ug sa Persons with Disability Affairs Office (PDAO) nga ipahimutang unya sa mga munisipalidad.
Una nang giingon sa PWD sector, nga tumong niini nga mas mapadali ang paghatod sa mga serbisyo ug masiguro nga walay PWD nga mapasagdan o mabiyaan sa mga programa ug inisyatibo sa lokal nga panggamhanan.
Samtang, nagpabilin ang LGU Mahayag nga komitado sa pagpalambo ug pagtabang sa PWD sector aron ang tanang PWD adunay patas nga higayon sa pagdawat sa serbisyo ug benepisyo gikan sa gobyerno.
