Miabot na sa 42 ka lokal nga kagamhanan (LGUs) ang mikompirma sa ilang pagsalmot sa Governor’s Cup U18 Basketball Tournament nga sugdan sa Septyembre 26 karung tuiga sumala sa Cebu Provincial Sports Commission (CPSC).
Giingon ni CPSC Commissioner Mark Anthony Ynoc nga dugang 22 ka siyudad ug lungsod ang miapil sa listahan, lakip ang lungsod sa Argao, Danao City, Naga City, Liloan, Dumanjug ug uban pa. Miapil sila sa unang 20 ka LGUs nga una nang nakakompirma, lakip ang dakbayan sa Lapu-Lapu, Mandaue, Carcar ug lungsod sa Cordova.
Gilauman nga mahimong lig-on nga contenders ang Dumanjug, Liloan, San Francisco, Naga City ug Mandaue City tungod sa ilang lig-on nga grassroots basketball program. Samtang, wala pa makakompirmar ang two-time defending champion nga Talisay City.
Makadawat ang kampyon og P500,000, samtang P250,000 ang runner-up, P100,000 ang ikatulong pwesto ug P50,000 ang ikaupat. Giplano nga ipahigayon ang opening ceremony sa SM Seaside Arena Cebu.
Photo courtesy: Cebu Daily News
