Mokabat sa P680,000 nga kantidad sa illegal nga druga ang nakumpiska sa mga operatiba sa Philippine Drug Enforcement Agency (PDEA) Regional Office 9, gikan sa usa ka 33-anyos nga mag-uuma atol sa buy-bust operation sa Barangay Tiguma, Pagadian City, mga alas 3:20 sa hapon adlaw’ng lunes, Agosto 3, 2026.
Ang operasyon gipangunahan sa PDEA Zamboanga del Sur Provincial Office uban sa nagkadaiyang unit sa Philippine National Police ug Regional Mobile Force Battalion 9 nga miresulta sa pagkasikop ni alyas Datz, residente sa Barangay Payong, Sultan Naga Dimaporo, Lanao del Norte.
Narecover sa operasyon ang kapin 100 gramos sa gidudahang shabu, lakip ang motorsiklo, cellphone, buy-bust money, mga plastic sachet, paper bag ug ID sa suspetsado ug uban pang mga butang nga iyang gipanag-iyahan.
Gikatakda nga atubangon sa suspetsado ang kasong paglapas sa Section 5, Article II sa RA 9165, kon Comprehensive Dangerous Drugs Act of 2002.
Samtang, gidayeg ni PDEA Regional Director Bryan B. Babang ang mga operatiba ug gipasalig ang padayon nga kampanya batok sa ilegal nga droga sa rehiyon.
Photo Courtesy: PDEA-9 RO-IX
