Gidakop sa kapolisan ang usa ka 27-anyos nga lalaki nga giila sa alyas nga “Rey” human siya gitudlo nga mipatay sa iyang duha ka tuig nga stepson didto sa Barangay Catmon, Naval, Biliran niadtong nakalabay nga Agosto 01, 2026.
Base sa inisyal nga imbestigasyon, alas-10:30 sa gabii dihang nakit-an ang bata nga wala nay panimuot duol sa ilang pinuy-anan ug gidali kini pagdala sa Biliran Provincial Hospital aron matambalan. Apan, gideklarar kini nga dead-on-arrival sa attending physician tungod sa traumatic brain injury.
Sa pag-abot sa mga pulis gikan sa Naval Municipal Police Station, ilang namatikdan ang grabeng samad sa luyo sa ulo sa bata ug dayong nakigkoordinar sa Biliran Provincial Forensic Unit alang sa crime scene processing ug forensic examination.
Sa lawom nga imbestigasyon nga gihimo sa Women and Children Protection Desk (WCPD) ug General Investigation Section sa Naval MPS, nakatigom ang mga imbestigador og mga ebidensya ug pamahayag nga nagtudlo sa stepfather sa biktima isip nag-unang suspek. Sumala sa kapolisan, positibong giila sa upat ka tuig nga igsoon sa biktima ang suspek nga maoy matud pa misuntok sa bata og duha ka higayon ug mitukmod niini ngadto sa yuta, nga maoy hinungdan sa grabeng samad nga misangpot sa iyang kamatayon. Nadiskobrehan usab sa imbestigasyon nga nasuko ang suspek tungod sa padayon nga paghilak sa bata.
Human makab-ot ang probable cause, gidakop dayon ang suspek ug gipahibalo sa iyang katungod ubos sa Miranda Doctrine sa pinulongang iyang nasabtan sa wala pa siya gidala sa Naval MPS alang sa hustong dokumentasyon ug pagproseso sa kaso.
Giandam na usab sa kapolisan ang pagsang-at og kasong Murder batok sa suspek pinaagi sa inquest proceedings.
Photo Courtesy: Biliran PPO
