Patay ang usa ka 25 anyos nga lalaki human maaksidente sa iyang gisakyan nga motorsiklo sa Barangay Bulanit, Labangan, Zamboanga del Sur, mga alas-12:38 sa kadlawon, Agosto 3, 2026.
Base sa imbestigasyon sa Labangan Municipal Police Station, ang biktima nga taga-Tigbao, Zamboanga del Sur, nagmaneho sa iyang pula nga Motoposh motorcycle gikan sa Pagadian City padulong sa Barangay New Labangan.
Gituohang wala niini namatikdi ang metal warning sign nga gibutang duol sa tulay nga kamulo pang giayo, hinungdan nabanggaan kini sa driver ug nalabay ngadto sa kalsada.
Nakaangkon ang biktima og grabeng samad sa ulo ug pagkabuak sa bagol-bagol ug gideklarang patay diha pa lang sa lugar nahitabuan sa attending physician.
Gidala na ang lawas sa biktima sa usa ka funeral home samtang ang motorsiklo gidala sa Labangan Municipal Police Station alang sa hustong disposisyon.
Samtang nagpahimangno ang kapulisan sa tanang motorista nga mag-amping sa pagmaneho, sundon ang mga warning signs, ug likayan ang pagpadagan og kusog aron malikayan ang susamang trahedya.
Photo Courtesy: PIO ZSPPO
