Nadakpan sa kapulisan ang usa ka 34-anyos nga construction worker, human sa nahitabong pagpanigbas sa Purok Pinadayag, Barangay Baga, Dumalinao, Zamboanga del Sur, mga alas-3:40 sa hapon niadtong nakalabay nga adlaw.
Sumala sa imbestigasyon sa Dumalinao Municipal Police Station, nag-inom ang suspetsado ug ang 31 anyos nga biktima sa dihang niabot sa punto nga sila nagkalalis sa wala gitumbok nga rason.
Ang panaglalis miresulta sa pagpanigbas sa suspetsado ngadto sa biktima makaduha sa wala nga abaga gamit ang usa ka hait nga hinagiban hinungdan sa pagka-angkon ug samad sa biktima.
Gidala una ang biktima sa Dumalinao Rural Health Unit alang dinaliang pagpatambal, ug dayon gi-refer sa usa sa mga tambalanan sa syudad alang sa dugang nga pagpatambal.
Dali usab nga misibat ang suspetsado human sa hitabo apan sa tabang sa mga nakasaksi ug sa dinaliang hot pursuit operation sa kapulisan nadakpan ra dayon kini sa usa ka payag sa Barangay Mecolong, Dumalinao,Zamboanga del Sur.
Ang suspetsado sa karon anaa na sa kustodiya sa Dumalinao Municipal Police Station aron kini papanubagon sa iyang nahimong salaod.
Photo Courtesy:ZSPPO
