Giawhag sa DepEd Region 9, ang tanang pampublikong eskwelahan sa rehiyon nga gamiton ang pondo sa MOOE alang sa pagpalit ug metal detector isip kabahin sa pagpalig-on sa seguridad sa mga estudyante alang sa mga pampublikong tulunghaan.
Segun ni DEPED IX Regional Director Ronelo L. Firmo, ang pagpalit ug mga metal detector magdepende na sa pamaagi sa principal kun unsaon sa pag-reallign sa budget ilabina nga wala nay dakong galastuhan ang DEPED ilawom sa pagpatuman sa instructional block.
Segun ni Firmo, ang pagbaton ug metal detector makatabang sa pagsusi sa mga mosulod sa eskwelahan aron malikayan ang pagsulod sa mga armas ug uban pang delikadong butang.
Pagpaklaro ni Firmo nga ang pagpalit sa maong kagamitan mahimong ipasiugda pinaagi sa MOOE, depende sa panginahanglan ug prayoridad sa matag eskwelahan.
Nagtuo si Firmo nga pinaagi sa hiniusang paningkamot sa mga administrador, magtutudlo, ginikanan, ug lokal nga komunidad, masiguro ang mas luwas nga eskwelahan alang sa tanang mga magtutungha sa Zamboanga Peninsula.
