Patay ang usa ka 57-anyos nga lechonero human gipusil sa usa ka wala pa mailhing lalaki sa Purok Pioneer, Barangay Visayan Village, Tagum City, Davao del Norte, alas 5:30 sa hapon niadtong nakalabay nga adlaw.
Giila ang biktima sa alyas nga “Aladino,” usa ka minyo ug residente sa maong lugar. Sumala sa inisyal nga imbestigasyon, sa dihang nagpahulay kini sa duyan gawas sa ilang balay, kalit nga giduolan sa suspek ug gipusil sa ulo nga bahin nga maoy hinungdan sa iyang hinanaling kamatayon. Human madawat ang report gikan sa usa ka concerned citizen, dayon mitubag ang kapulisan sa Tagum City Police Station aron siguruhon ang crime scene ug sugdan ang pagpangita sa suspek.
Base sa mga testigo, ang mamumuno mikalagiw sakay sa kolor yellow ug walay plaka nga motorsiklo padulong sa direksyon sa Anika Homes. Sa pagproseso sa lugar sa krimen, nakarekober ang Davao del Norte Provincial Forensic Unit og usa ka basiyo sa bala nga gituohang gikan sa kalibre .45 nga armas.
Padayon karon ang lawom nga imbestigasyon aron matino ang motibo sa pagpamusil ug mailhan ang responsable. Samtang usa sa gilantaw sa mga otoridad mao ang posibilidad sa personal nga panagbangi, apan wala pa kini mapamatud-i.
Nagpahigayon na usab og hot pursuit ug dragnet operation ang kapulisan ubos sa mando ni PLtCol Edgardo G. Bahan, Acting Chief of Police sa Tagum City Police Station, ug nag-awhag sa publiko nga motabang pinaagi sa paghatag og kasaligan nga impormasyon aron madakpan ang mga responsible sa maong krimen ug mahatagan og hustisya ang biktima.
