Patay ang usa ka 17 anyos nga lalaki samtang usa ka 28 anyos nga lalaki ang naangol sa usa ka insidente sa pagpangluba nga nahitabo sa Bulangan sa Barangay Lahi, lungsod sa Gigaquit, Surigao del Norte.
Base sa inisyal nga imbestigasyon sa kapulisan, giingong unang giluba sa batan-ong biktima nga nailhang si alyas “Long-long” Dingding, residente sa Barangay Sapa, Claver, Surigao del Norte, ang 28 anyos nga si Jhon Mark Bausing, taga Barangay Ladgaron, Claver, nga karon padayon pang nag paalim sa balay tambalanan tungod sa iyang naangkon nga mga samad.
Human sa maong panghitabo, miarangkada usab ang giingong uyoan ni Bausing nga si Reynaldo Mogenio ug giingong mao ang responsable sa pagkamatay sa 17 anyos. Human sa insidente, boluntaryo usab kining mitahan si Mogenio sa Gigaquit Municipal Police Station aron moatubang sa imbestigasyon.
Sa pagkakaron, nagpadayon pa ang lawom nga imbestigasyon sa kapulisan aron matino ang hingpit nga dagan sa panghitabo ug ang motibo nga misangpot sa maong madugoon nga insidente. Samtang wala pa mahuman ang imbestigasyon, wala pa usab mopagawas ang kapulisan og dugang detalye bahin sa kaso.
Photo Courtesy: john mike
