Nakahiagom og bun-og ug pangus sa kalawasan ang duha ka dalaga dihang aksidenteng mabanggaan sa usa ka motorsiklo samtang mitabok kini sa highway sa Km. 2, Barangay Luna, Surigao City.
Base sa report sa kapolisan, ang motorsiklo nga Honda Click 125 nga kolor gray gimaneho sa usa ka 49-anyos nga lalaki nga residente sa Pantalan 1, Barangay Taft, ning dakbayan.
Nasayran usab nga wala kini’y driver’s license. Ang mga biktima mao ang usa ka 23-anyos ug usa ka 22-anyos nga babaye, parehong residente sa lungsod sa Socorro, Surigao del Norte.
Sa inisyal nga imbestigasyon, padulong sa sentro sa siyudad ang motorsiklo samtang ang duha ka babaye nilabang sa Pedestrian lane sa karsada. Gipatabok sila sa ubang sakyanan nga ni-minor apan ang motorsiklo nga nagikan sa likod nga bahin kalit nga ming-overtake ug didto nabanggaan ang duha ka biktima.
Human sa insidente, misutoy sa pagpadagan ang motorsiklo padulong sa city proper. Apan Kagahapon, nag-abot sa kapolisan ang duha ka partido ug nakasinabot nga husayon ang nahitabo ug bayran ang damyos.
Photo Courtesy:Dreamstime.com
