Sikop ang usa ka 48-anyos nga lalaki human makuhaan og mga smuggled nga sigarilyo sa gikasang buy-bust operation sa mga otoridad sa Purok 2, Barangay Poblacion, lungsod sa Barobo, niadtong nakalabay nga adlaw.
Giila ang suspetsado nga residente sa Purok 6 sa maong barangay. Nagtinabangay sa maong operasyon ang mga personahe sa Barobo Municipal Police Station (MPS) ubos sa pamunoan ni PLT Rizza O. Mahilum, Deputy Chief of Police for Admin, ug sa superbisyon ni PMAJ Andrew G. Lupian, Officer-in-Charge.
Nakuha gikan sa dinakpan ang usa ka ream nga Filter Kings Commando nga maoy buy-bust item, usa ka P500 bill nga gigamit isip marked money, upat ka dugang ream sa Filter Kings Commando, usa ka ream sa International Commissioner Menthol ug 21 ka pakete sa King Opens nga sigarilyo.
Kasamtangan nang natingkagol sa selda sa Barobo MPS ang suspetsado kinsa mag-atubang ug tukmang kaso, samtang giandam pa ang mga gikinahanglang dokumento para sa disposisyon sa mga nasakmit nga produkto.
Photo courtesy: Barobo MPS
