Nakuhit ang kampyonato sa women’s ug men’s 21-kilometer race nila Artjoy Torregosa ug Kenyan runner Eric Chepsiror sa unang Governor’s Zero Hunger Run gahapong adlawa, Agosto 2, sa Cebu Provincial Capitol grounds. Nag-una si Torregosa sa women’s division human makompleto ang dagan sa 1 oras, 32 minutos ug 16 segundos. Ikaduha si Kay Razel Cundangan ug ikatulo si Josephine Rodriguez.
Sa men’s division usab midaog si Chepsiror sa oras nga 1:12:59, gisundan sa iyang kauban nga Kenyan nga si Daniel Boiwo ug Luka Lagat. Bisan pa sa iyang kadaugan, mipadayon pa sa pagdagan si Torregosa aron makompleto ang iyang 30-kilometer training isip pagpangandam sa 2026 Asian Games sa Japan.
Mokabat sa 3,500 ka partisipante ang miduyog sa nagkalain-laing race categories sa maong kalihukan, nga gipangulohan sa Cebu Provincial Government isip kabahin sa kampanya batok sa kakulang sa pagkaon o kagutom.
Photo source: Cebu Daily Inquirer
