Mahimo na nga makadawat ang mga pasyente maadmit sa 16 ka district ug provincial hospitals nga gidumala sa Kapitolyo sa lalawigan sa Sugbo og mga libre nga linen ug admisstion kit isip kabahin sa bag-ong programa sa kagamhanan sa probinsiya.
Ubos sa maong programa, ang matag pasyente nga maadmit makadawat og bag-ong set sa linen nga naglangkob sa fitted sheet, unlan, punda sa unlan, ug habol nga mahimong dad-on sa pasyente kung madischarge na kini.
Gawas sa linen set, makadawat sab ang mga pasyente og komplimentaryong admission kit nga adunay kutsara ug tinidor, tissue, tualya, toothbrush, toothpaste, sabon, alcohol, calibrated medicine cup, thermometer, medical adhesive tape, ug paper bag.
Ang mga linen ug admission kit ihatag nga walay dugang bayad sa mga pasyente. Matud ni Capitol Health Consultant Dr. Nikki Catalan nga ang programa sa libre na linen una na nga gipatumana sa Cebu Provincial Hospital – Bogo City.
Human nga napamatud-an nga epektibo ang maong lakang, ipatuman sab kini ngadto sa tanang 16 ka district ug provincial hospitals. Ang maong inisyatiba kabahin sa padayon nga paningkamot sa Kapitolyo sa pagpauswag sa kalidad sa serbisyo sa mga ospital ubos sa administrasyon ni Cebu Gov. Pamela Baricuatro.
Photo courtesy: Cebu Province
