Giawhag sa Konseho sa Dakbayan sa Sugbo ang tanang gasoline station operators nga magbutang og labing menos duha ka electric vehicle (EV) charging stations aron mapalapad ang charging network ug masuportahan ang nagkadaghang paggamit sa electric vehicles.
Ang maong resolusyon, nga gisulong ni Konsehal Edgardo “Jaypee” Labella III ug giaprobahan sa regular nga sesyon niadtong Hulyo 28, nahiuyon sa Republic Act No. 11697 o Electric Vehicle Industry Development Act (EVIDA), nga nagdasig sa pagpalambo sa EV industry ug charging infrastructure sa nasud.
Sumala ni Labella, makatabang ang dugang EV charging stations sa pagpakunhod sa “range anxiety” sa mga tag-iya sa electric vehicles, pagdasig sa mas daghang motorista nga mobalhin ngadto sa electric mobility, ug paghatag usab og dugang oportunidad sa negosyo alang sa mga gasoline station operators.
Ubos sa resolusyon, gisuportahan ang koordinasyon sa City Treasurer’s Office, City Planning and Development Office, ug Cebu City Transportation Office (CCTO) uban sa Department of Energy ug Department of Trade and Industry aron mapadali ang permitting process ug pagpatuman sa maong inisyatiba.
Photo courtesy: Philippine News Agency
