Angol ang tulo ka mga lalaki human masunog ang usa ka balay sa Conseguera Compound, Barangay 20-B, Bajada, Davao City, sayong buntag Hulyo 29, 2026. Sumala sa Davao City Fire District, ngsugod ang sunog alas-5:00 sa buntag ug gideklarang fire out alas-5:35 sa buntag.
Sa inisyal nga imbestigasyon, usa ka duha ka andana nga balay nga adunay tulo ka mga kwarto sa ubos ug upat ka mga kwarto sa taas ang gilamoy sa kalayo.
Matod pa sa mga otoridad nga natulog ang mga nagpuyo sa balay sa dihang kalit nga miulbo ang sunog, hinungdan nga wala na sila makaluwas sa ilang mga personal nga kabtangan.
Ang tulo ka mg samaran gihatagan dayon og first aid sa mga responder, samtang ang usa kanila gidala sa Southern Philippines Medical Center (SPMC) alang sa dugang pagtambal.
Padayon pa sa pagkakaron ang imbestigasyon aron mahibal-an ang tinuod nga hinungdan sa sunog ug ang kantidad sa mga kabtangang nadaot.
